लिफ्ट देण्याच्या बहाण्याने लूटमार करणाऱ्या टोळीला अकलूज पोलिसांनी केले गजाआड; ९९ हजार ३५० रुपयांचा मुद्देमाल जप्त!
सह.संपादक महेश पांडवे 9511875416
अकलूज:
लिफ्ट देण्याच्या बहाण्याने एका व्यक्तीला अज्ञात ठिकाणी नेऊन, जबर मारहाण करत सुमारे १ लाख रुपयांची रोकड लुटणाऱ्या सराईत गुन्हेगारांच्या टोळीला अकलूज पोलिसांनी अत्यंत चाणाक्षपणे बेड्या ठोकल्या आहेत. गुन्हा घडल्यापासून अवघ्या काही तासांतच पोलिसांनी तपासाची चक्रे फिरवून तिन्ही आरोपींना गजाआड केले आहे.
नेमकी घटना काय?
मिळालेल्या माहितीनुसार, सांगली जिल्ह्यातील जत तालुक्यामधील वायफळ येथील रहिवासी असलेले फिर्यादी हे दिनांक ३ जून २०२६ रोजी अकलूज येथील ‘हॉटेल डिव्हाईन’ येथे जेवण करून नवीन बस स्टँडकडे पायी चालले होते. दरम्यान, दुचाकीवरून आलेल्या दोन अज्ञात इसमांनी त्यांना “आम्ही तुम्हाला सोडतो” असे म्हणून लिफ्ट देण्याच्या बहाण्याने गाडीव बसवले.
मात्र, बस स्टँडकडे न जाता आरोपींनी फिर्यादीला एका निर्जन व अज्ञात ठिकाणी नेले. तिथे त्यांना जबर मारहाण करण्यात आली आणि त्यांच्याजवळील ९९ हजार ३५० रुपयांची रोख रक्कम बळजबरीने काढून घेऊन आरोपी पसार झाले.
अकलूज पोलिसांची तत्परता आणि कारवाई
या घटनेची माहिती मिळताच अकलूज पोलिसांनी प्रकरणाचे गांभीर्य ओळखून तात्काळ तपासाची चक्रे फिरवली. गुप्त बातमीदार आणि तांत्रिक विश्लेषणाच्या आधारे पोलिसांनी संशयितांचा माग काढला.
पोलिसांनी कसून चौकशी करत खालील तीन आरोपींना ताब्यात घेतले:
1)सुनील भीमराव भिंगारदिवे (रा. राऊत नगर, अकलूज, ता. माळशिरस)
2)आजिनाथ नागनाथ गिरी
3)संतोष महादेव गायकवाड दोघे राहणार सराटी तालुका इंदापूर जिल्हा पुणे
पोलिसी खाक्या दाखवताच या तिन्ही आरोपींनी गुन्ह्याची कबुली दिली आहे.
या पथकाने बजावली कामगिरी
ही धडक कारवाई अकलूज पोलीस उपनिरीक्षक विशाल कदम यांच्या मार्गदर्शनाखाली पोलीस हवालदार शिवकुमार मदभावी, विक्रम घाटगे विनोद साठे, सुहास क्षीरसागर, राहुल रुपनवर, विशाल पोरे, खरात, पंडित गवळी आणि काळे यांच्या पथकाने केली.
अकलूज पोलिसांच्या या कामगिरीमुळे नागरिकांमधून समाधान व्यक्त होत असून, गुन्हेगारांवर पोलिसांचा वचक निर्माण झाला आहे. पोलीस आता या टोळीने अशाच प्रकारे आणखी काही गुन्हे केले आहेत का, याचा अधिक तपास पोलीस करत आहेत.
