इंदापुरात राजकीय कट्टर विरोधक हर्षवर्धन पाटील आणि दत्तात्रय भरणे एकत्र;

संपादक सुनील निकम 7038353599

​इंदापूर: “राजकारणात कोणीच कोणाचा कायमचा शत्रू किंवा मित्र नसतो,” या उक्तीचा प्रत्यय पुन्हा एकदा इंदापूर तालुक्यात आला आहे. अनेक दशकांपासून एकमेकांचे कट्टर राजकीय प्रतिस्पर्धी मानले जाणारे माजी मंत्री हर्षवर्धन पाटील आणि कृषिमंत्री दत्तात्रय भरणे आता जिल्हा परिषद आणि पंचायत समिती निवडणुकीसाठी एकत्र आले आहेत. विशेष म्हणजे, तालुक्यातील प्रबळ नेते आप्पासाहेब जगदाळे यांनीही या युतीला साथ दिल्याने तालुक्याच्या राजकारणात मोठी खळबळ उडाली आहे.
​मैत्रीपूर्ण लढतीतून ‘महायुती’कडे?
​गेल्या अनेक विधानसभा निवडणुकांमध्ये पाटील आणि भरणे यांच्यात अटीतटीचा संघर्ष पाहायला मिळाला होता. मात्र, आगामी स्थानिक स्वराज्य संस्थांच्या निवडणुकीत सत्ता राखण्यासाठी आणि विरोधकांना शह देण्यासाठी या दोन्ही नेत्यांनी हातात हात घातला आहे. जिल्हा परिषद आणि पंचायत समितीच्या सर्व जागांवर विजय मिळवण्याचा निर्धार या त्रयींनी व्यक्त केला आहे.
​आप्पासाहेब जगदाळेंची भूमिका निर्णायक
​पुणे जिल्हा बँकेचे संचालक आप्पासाहेब जगदाळे यांची साथ या नव्या समीकरणासाठी अत्यंत महत्त्वाची मानली जात आहे. जगदाळे यांचा तालुक्यात स्वतःचा मोठा गट असून, त्यांच्या समावेशामुळे या युतीची ताकद द्विगुणीत झाली आहे. आगामी काळात ही नवी ‘त्रिशक्ती’ इंदापूरच्या राजकारणाची दिशा ठरवणार असल्याचे स्पष्ट दिसत आहे.