मराठा क्रांती मोर्चाच्या लढ्याला मोठे यश; ‘सारथी’च्या माध्यमातून यूपीएससीमध्ये १२ मराठा तरुणांची उत्तुंग भरारी!
पश्चिम महाराष्ट्र संपादक दादासाहेब जगताप
पुणे:
मराठा आरक्षणाच्या संघर्षातून आणि मराठा क्रांती मोर्चाच्या रेट्यातून निर्माण झालेली ‘सारथी’ छत्रपती शाहू महाराज संशोधन, प्रशिक्षण व मानव विकास संस्थाआता खऱ्या अर्थाने मराठा समाजातील गुणवंत मुलांसाठी दिशादर्शक ठरत आहे. केंद्रीय लोकसेवा आयोगाच्या (UPSC) नुकत्याच जाहीर झालेल्या निकालात सारथी संस्थेच्या मार्गदर्शनाखाली तब्बल १२ विद्यार्थ्यांनी घवघवीत यश संपादन केले असून, त्यांच्यावर सर्वस्तरातून अभिनंदनाचा वर्षाव होत आहे.
काही वर्षांपूर्वी मराठा समाजाने आपल्या न्याय्य हक्कासाठी राज्यभर मूक मोर्चे काढले होते. या चळवळीची एक प्रमुख मागणी म्हणजे समाजातील तरुणांना स्पर्धा परीक्षांसाठी हक्काचे व्यासपीठ आणि आर्थिक पाठबळ मिळावे ही होती. त्यातूनच ‘सारथी’ संस्थेची स्थापना झाली. आज या संस्थेच्या प्रशिक्षणातून तयार झालेले विद्यार्थी थेट दिल्लीच्या तख्तापर्यंत पोहोचल्याने मराठा मोर्चाच्या लढ्याचे हे मोठे यश मानले जातआहे.यशस्वी विद्यार्थ्यांची वैशिष्ट्ये ग्रामीण भागाचा टक्का: यशस्वी झालेल्या १२ विद्यार्थ्यांपैकी बहुतांश विद्यार्थी हे ग्रामीण आणि शेतकरी कुटुंबातील आहेत.
सारथीचे पाठबळ: दिल्लीतील उच्च दर्जाचे कोचिंग, राहण्याचा खर्च आणि मासिक विद्यावेतन (Stipend) यांमुळे या विद्यार्थ्यांना कोणत्याही आर्थिक विवंचनेशिवाय अभ्यास करता आला.
तज्ज्ञांचे मार्गदर्शन: सारथीने उपलब्ध करून दिलेल्या विशेष मेंटॉरशिप प्रोग्राममुळे मुलांचा आत्मविश्वास वाढला.
समाजात आनंदाचे वातावरण
या निकालानंतर मराठा समाजातील कार्यकर्त्यांनी आणि पालकांनी मोठा आनंद व्यक्त केला आहे. “आमच्या मुलांमध्ये गुणवत्ता होतीच, फक्त त्यांना संधी आणि सोयींची गरज होती. सारथीने ती उणीव भरून काढली,” अशी भावना एका यशस्वी विद्यार्थ्याच्या पालकाने व्यक्त केली.
